wrapper

وَردَه

 

المحامي

عماد عبد الرحيم الماجدي

 

وردَه امْعـَطـّره ابريحان  وكًرنفـُل ـ وعـْيونه يغار الليل من عِـدهـَه

سودَه امكحِـلـّه ورموش تِـتباهَه ـ وتـْعارك كِحلهَه ايغار من حـَدهَه

اخدودَه بالوجه شـِمـّـام إي والله ـ تعال اشتـَم ولك شمّام من خـَدهَه

وسنونه تنعثر دِر يغيض الناس ـ خِتل حَدر الحلِـًك ويْبوس شِفـّتهَه

فوًك الشفه خال او هاليعِـط نِعـْناع ـ اًقصِد شامَه للخـَديـن ضـَوّتهـَه

بسيوفه العـَـله العينين يتغاوَه ـ حُواجب لو رمَت ياعاشـًك احـذرهَه

ياعِـطر البنفسج والعِـطِـر فوّاح ـ هَيعـونـَه الـْيفِـز بالليل ويـِْـشمهـَه

ياعـود السفـَرجـَـل من تميل اتميل ـ تـِتغـاوه غـَـنج والكًـاع مالمهَه

وحق الحق والحق اليحق الحق ـ كل احقوق هذا الكون من حـَـقهَه

***

 

نظراتـَه سهـَم ويـْرامي بيه الـْـناس ـ أتمنه سَهـَم بالرّوح ويشِجهـَه

جلماتـه غـَزل وتـحارب العِـشاًك ـ طلاسِـم ماأظِـن كل واحِد ايفِـلهـَه

وعيونه غموض اتكًـول حزورات ـ حزورة عشًك ماتـِكًـدَراتحِـلهـَـه

وزلوفه اكًـعِـدَت ياصبّه عَ المتنين ـ جدايلهه اوكًعت بالزلف شدّتهَه

غصن البان مِتسّيد على الأغصان ـ شجرة هيل حَسرَه اعليك شَمـّتهَه

أحـْسبهـِن رموش العـين واويلاه ـ كل شعـره رُمُح وتـْرامي  نـَـبلتهَه

ورياكًـه عسل ماسوّته النحلات ـ كل هذا العـَـسل ياصـَبـّه من عِـدهَه

بلبل لو حجت وتغرّد ابكل روض ـ سِمْعـَتهـَه البلابل نِـست غِـنوتهـَه

***

يامزيون يـَمـْضمـّر يـَبو الشامات ـ يطرزَن بالعِـشِـًك تـُـفاح البخـَدّه

لوعـينه فتحهَه البحر من ايموج ـ يتراكًـص ابعينه الموج يـِتـهَـدّه

غرنوًك اويباهي حِـسنه بالغزلان ـ نوبات الغــَزال ايغار من صـَـدّه

ياحِسَّه العـَزف من يحجي بالجلمات ـ بالناي الـعزف والعود يتحدّه

مُهـرَه امضمّره وتـْـفزز الخيـّـال ـ تِـتمـَشـّه ابغـَـنج للغـَمزه تِـتـفـَدّه

لو سَهمه رمَه من قوسه نِشّابات ـ يضربك بالكًلب ماتكًـدَر اتـْصِدّه

والنوب الدمع لـو طرّز الـخدّين ـ ليلو اودر تِنعثـَر فاض من عِـندَه

ياشامه اوتريد اتعارك الشفـّـات ـ ورضاب الشفايف عَسل هالـْـنـَدّه

***

تلاكًينـَه كًـعـَدنه اهواي فوًك اهواي ـ والشاهِـد كًـمَر مذبوح بالحَسرات من كًــَده

ونـْجـُوم اوسُـكون الليل ومْهـامَـس ـ كل الليـل  آنـَه اوياه سهـْرانين ماهِـدّه

دًك كًلبي ، اوسِـمعـْـته ايكًـول يتنهـّد ـ غِـزاني الشيب شوف الراس وتـْعـَدّه

وتذكر سوالفنه ابتوالي الليل للغـبشَه ـ مامش نوم نتسحـّر ، إيد ابإيد نتغدّه

وعـْدل زلفـَه من يهـْدل على المتـنين ـ جـوريـّه الـْورد وتـْشابـًك الـْـشـدّه

شنهي الورد هالضيـّع إسِـم إسْمه ـ سأل عـَـنـّـه الإسم ؟ كًال الإسم وَردَه

جـِبـَـل إنت يـعالي او ماإلك منـْهـَه ـ جـِبـل عالي ينِـشدك إنت مـَتـْـنِشـْـدَه

بهـْداي اوهـِمَست ابإذنه احبنـّك ـ رجف كلـّه رجـَف صاح اوطلب نجدَه

ياويلي على المامش عِـشِكًـنـَه اينام ـ يتغـَـطـّه ابدمعـنـَه والسَهـَر هـَـدّه

***

ياويلي العشًك لو بـَـلـّـل اليمشون ـ مثل صيف المطر ويخاف من رعـدَه

مثل فاس الـْحـَفر من يحفـُر الكًـيعان ـ وبكًـاع الحـَفـُر بيهه انكِسر ربـْدَه

تالي اشلون كتله اشلون كًال اشلون ـ ألف اشلون وشلون اوبعَـد بـَعـده

زرعـينه العِـشًك نِتـْـنـَـطر المزنات ـ ياوسفه زرعـْـنه والثــُمـَر ( سِـعـْـدَه )

حط خده على اخدودي اولجعني الشوًك ـ لـز خدّه اعله خدّي ياحسِن خـَدّه

كِـًلـي اشلون شيّبنه او سحكًـنه الرّيل ـ فراكًينه اتعـِبَـت ونكِسْـرت السَـدّه

كًـتـله اصبَـر عشكًـنه الموت لبنادم ـ هم شفت اليموت ايـكًـوم من لِـحدَه

وردَه انت يبعد الروح يالـْورده ـ هم شِفت الـدَغـَل لحظه انـْـكًـلـَـب ورْدَه

***

شو دَمعـَه اجَت طفحَت على الخديّن ـ شربن من رموش العين دَمعـَـتهَه

اشوف اجبال وتـْحَركت تريد الكًـاع ـ زلـْزال اورعـَـد ياصَـبّه عـَبـْرَتـهـَه

بجيت اوياه ودموعي تِـطِـر الـْزيج ـ ودْموعي اشبكًـت يابويـَه كِحلـَتهـَه

أشوفن بيهه جنهه اتعاتب العِـشاك ـ حـُب جلمَه جبيره اتبوس شِـفـّـتهَه

من اتحِـب يخويـَه كًلبك اتـْخـَـلـّيه ـ رهـينـَه لِـلـْـيحِـب والعـْيـن تِـرهـَـنهَه

وتـْـرافـُس تِـظِـل بيد الـْطِفـِل خـلـوّك ـ طـيرَه اوماتـِكًـول أحـّاه ويهـِـدهَه

أسـلــّم أمري للخالق يـَبعـْد اجلاي ـ هذا الله اويـِخِـط لِـلناس قِـسْـمـَـتهَه

لكن والله والخالق سَـبِـِع كًامات ـ أزف روحي ابْـجـِفـَن بشـْموع زفـّتهـَه

وخلـّيهَه الهـَلاهِـل جنهه طـًك الجـّيل ـ أهـَلهِـل والـِدمع بالعـين نـَشفـتهَه

ورده امعطره ابريحان وكًرنفل تراه ايفوح ـ وعيونه يغار الليل من عـدهَه

 

Last modified on الثلاثاء, 03 آذار/مارس 2015

عن الموقع

 المندائية موقع مندائي اخباري يختص بالقضايا المندائية الدينية والأجتماعية كما يوفر اخبار حول العالم يتيح للكتاب نشر مقالاتهم كما لا يتحمل الموقع أي مسؤولية قانونية عن دقة أوصحة أو شمولية  المعلومات الوارد 

تأسس الموقع سنة 2001 يضم الموقع العديد من الزوايا منها اول غرفة المندائية للمحادثة الصوتية, صفحة الأخبار،صفحة الكتاب,منوعات, كما انطلق من الموقع اول راديو مندائي على الأنترنت و نسعى جاهدين للأرجاع الخدمة
موقع الشبكة المندائية موقع محايد منما يميزة عن بقية المواقع على النت
تم انشاء الموقع ودعمة من قبل السيد ماجد حميد سعيد

 

رجال الدين المندائي