wrapper

إلى كل - - أم صابئِـية

جـِبـت اشموع وعـْلكًت الشموع اليوم ـ كًـام الشمع يبجي اوعاف صينيـّه

خـليّـيت الورد كًلولي عيد الأم ـ شو وردي ذبل طاح اوخفت ضيـّه

كًالولي فرح ماندري عندك عـيـد ـ (بنهود الأمومه) اليوم لطـْميـّـه

(شيلـَـه) امعطرّه يـَم (جـَرغـد) المايل ـ يازينة نساء الكون صبيـّـه

 

ياورده تِـمـيـل ابـْروضة العِـشـّاًك ـ يامَـنبع شرف مديوف حِـنيـّـه

صبيـّه او تهِـز الكًاع من تمشين ـ بـِنِـت ديوان ـ والخطـّـار ليليـّه

فناجينج تِخِن بالكًهوه متروسات ـ دَلـّه او عَ الجمر مِتـْربعه يوميـّه

اعكًال امـكًصـّب اومرفوع فوًك الراس ـ وعكًال الزلم عَ الراس غاليـّه

***

عـيد اوهالإجَه كًالولي عيد الأم ـ أهدي امن الجسم ، يـُمـّه جـِلاويـّه

وزحف ع التراب الداسته رجليج ـ وكـحـّل عيني من تربان شـاطِيـّـه

وكِـضـّن (شيلِتج) وشتمهه كل مصباح ـ يـَكِـلـّـج ماي وبكًـلبي سواجـيـّه

أصيرن حـَدرج اوفوكًج ييمه افراش ـ وحِـط اجفوفي حـدْر العين صينيـّه

بدموعِـج اشربـَن يمـّه والله ارتاح ـ أريدَن أرتوي يـُمـّه عـذِب مـَيـّه

بسْـم الأم ينادي الـهـَيي كل الناس ـ يوم المحـشر ان هدّت مراسِيـّه

الأم مدرسَه والزلم خـو طـِلاب ـ والـْحـَرْف انكتب وانت كِـتابـِـيـّه

دينج أول الأديان رابع دين ـ و ( اليهيا ) رفع ( كًـنـْـزة ) أهاليـّـه

***

إنت الخلفـّيتي الزين وبن الزين ـ والزين اليِـخـَـلـْف الزين زينيـّه

أوّل إنت يـُمـَّه الـفوز كل الفـوز ـ مايلـْـحـَــًك أبـَد بالـفوز تالِـيّــه

بيرغ انت يمـّه اودفـّة الربّـان ـ شيسَوّي اليقود ان طاح ساريـّـه ؟

الله اللي خِـلـَق آدم تـَـره اتـْراب ـ وانت من ضِلِـع آدم حواريـّـه

مـُوحكًي يـَيـُمّـه أبجي وَرْدَح حيل ـ كًبرج مالكًيته وين هالـْنِـيـّه ؟

كًِـلـْتلهم اجناغي ، اعران والجـِلاب ـ شـوفـو بالـلـّحد بيديهه جـفيـّه

راحـَو للحـد وقماشي بيه اعظام ـ شـافـَو عَ الـعظم مكتوب صبـِيـّـه  

جـِبـت اشموع وعـْلكًت الشموع اليوم ـ كًـام الشمع يبجي اوعاف صينيـّه

خـليّـيت الورد كًلولي عـيد الأم ـ شو وردي ذبل طاح اوخِـفـَت ضيـّه

 

 

Last modified on الثلاثاء, 03 آذار/مارس 2015

عن الموقع

 المندائية موقع مندائي اخباري يختص بالقضايا المندائية الدينية والأجتماعية كما يوفر اخبار حول العالم يتيح للكتاب نشر مقالاتهم كما لا يتحمل الموقع أي مسؤولية قانونية عن دقة أوصحة أو شمولية  المعلومات الوارد 

تأسس الموقع سنة 2001 يضم الموقع العديد من الزوايا منها اول غرفة المندائية للمحادثة الصوتية, صفحة الأخبار،صفحة الكتاب,منوعات, كما انطلق من الموقع اول راديو مندائي على الأنترنت و نسعى جاهدين للأرجاع الخدمة
موقع الشبكة المندائية موقع محايد منما يميزة عن بقية المواقع على النت
تم انشاء الموقع ودعمة من قبل السيد ماجد حميد سعيد

 

رجال الدين المندائي