wrapper



              هوسات وأبوذيات صابئية          

الـهـــــوسات

 

صـَفـّكـًـنـَه يـَصبـّه انـريـد قانـون

جـبنـَـه الطبلـَـه تركًـع يـَمهَه قانـون

عِـزفـنه اعله الوتـَر بـ ( الـقاف ) و ( النـّون )

ها / انـقوقي انهد اونثني انريد القاف ابْصَف النوّن

 

000

حـَطـّيـنـَه الـوَرق وانـريـد نِـكـتـِب

نكـتب ( قاف ) نِـرجع بـيه نِـشطب

( فاسَـك ) مو كِـسَرتـَه اشلون تــُحطب ؟

ها / (قاف) انجيبه او نكتب حرفه اوتالي اندوّر خويه (النوّن)

000

كِـلنه انصيح كًـمنـَـه انـريد قانون

(ثلث تالاف) إحنه اونطلب العـون

حـَمـّلنـَه الخشب سـَوّينـَه جـانـون

ها / وجـّت نار اوخِـمـْدَت هادَت ، فـَـحْم البيه ايْطـَفـّي النار

000

أحـَلفـَنـْـكـُم ابهَـيّـي الإسْـمَـه مـَبـروخ
كافي امن الـْـشـَـتم والغِـنـَه الـْمـَجـروخ

حَـجـينـَه ماخِلـَص نِحْجـيـه ونـْـفــُوخ

ها / الـْيشتِم صبّي ايشتـّم أهله ايشتّم نفسَه اومايدراش 
000

وين المرجعِـيّـه وين الاخـْيــار
وين الليّ يطفـّي النار والـْصار
كلام الشّين خوتي يفضَح اسْرار
ها / حَجْيي الهافت فاهي اوبارد ، زاد الماصِخ ماينكال
  
 000 
 
صبي انـْريد كون ايصير قـِدْوَه
صبتنه تِـتِـبعـَه اوتِـحـْذي حـَذوٍَه
قدوه المايشـَوّر صدكًـو حَـصْـوه
ها / اليتبع حَصْوه مشرك بالله ماظِن يامِن بالتوحيد
000
المايدري يَـصبـّه كَام يـِـدري
بالداته الحجي كالسّيل يجـري
مُصيبَه إن جنِت ماتدري ،أعـظـَـم لو جـِـنِت تدري
ها / واحد يتهَم بَخت الثاني اوثالث نفطه ايزيد النار
000
كِـل الناس صايـِر عِـدهَـه مَـوقِـع
يحْجـُون الحـَقيقـَـه اليوم وتــْـشِـع
قِـسِـم يقره الحقيقه اوقسم يـِـسْـمَع
قسم يكـْـتب فِـكِـر والـْثاني يـِقـْنـَع
شَمْسَ الله يَخَي من شـَرق تِـطلـَع
ها/ ايريد المغرب يصْبَح مَشرق ، ليل الدنيَه ايْصير انهار

الأبــوذيات

 

سيـفـك حِـطـّه بكًليبي وشرعـَـه

يـَدمي صار جـرفانـَـك وشـرعـَه

والله اوهيي والماري وشـَرعـَـه

سـيفـك من يشـِج كًـلبي هـَـديـّـه

000

صبّي الـْيِـشتِـم ابْصَبـّتـْـنـَه نـازل

مايـِـصْعـَد الماري اودوم نـازل

إحْـنـَه انريد قِـدوه ابحكَـنه نازَل

يـِـنازل كل مُـرَقْ دينه اونـَبـيـّه

000

حبيبي اوبالقساوه اشكثر معروف

أروح ادعي الأيـّمه اوشيخ معروف

فـَرِد نـَظره ولك واحْسبهه معروف

(زدقـَـه) اتصير واتصدّق عـليّ

000

مثل صايغ اوضاع اشلون شِـفـْـتــَه 
  
طريـق الـْـنـّور صبّي وانت شِـفـْـتـَه

بـُـوَث هـَيّي على الـْـسانـَه وشـِفـْـته

يذكر ماري كل صُـبـْح اومِـسـِـيــَّـه

000

                                كًـلبي ماخـُـمَـد ناره ولـَـك ثار

جـنـّك تِـفـعـَس ابروحي ولك ثار

بعض الناس تتمـنـّه ولك ثار ( الأكثر )

يـِـخافونك يـَبو اخـْـدود الـْـضويّـه

000

صبّه احنه نعـيش انموت صبّه

آدم عـَـالـبَـشر ديـن الله صَبـّـه

دينـك للإبن وبْـعـَـقـله صـُبـّـه

صبّي ايعيش بين اهله اوخويه

000

هاك اجروح كًـلبي اوشلهه بهداي

تِـلجمهه اوشكتلك ، ليش؟ بـهداي

اسلام اومسيح ايهود بهـْـداي ( بيه داي : صبه )

دِنيه .. اتصير من هجرك دنِـيـّـه

000

تِعـِت بالـْحـَـًك تريـد اشـلون جـَـربه

حـق الله يـِجـِرّك موش جـَربـَه

من نـص النهر تشرب الجربـَه *

نـَجِـس مايـَه تِكًـول النهر مـَيـّـه

000

ديـنـَـك يروي كل عطشان كلما ( كالماء )

شيثـه لو إجـَـت ، لِلـْهيي كـلما ( ناجيه )

كِلما انـريـد نبني خوتي كِـلـْـما ( كلّ ما )

يـِجـينه افـلان ويـْهـَدم البنـيـّـه

 

* من المثل البغدادي : النعجه الجربه تشرب المي من نص الشط

 

 

 

 

Last modified on الثلاثاء, 03 آذار/مارس 2015

عن الموقع

 المندائية موقع مندائي اخباري يختص بالقضايا المندائية الدينية والأجتماعية كما يوفر اخبار حول العالم يتيح للكتاب نشر مقالاتهم كما لا يتحمل الموقع أي مسؤولية قانونية عن دقة أوصحة أو شمولية  المعلومات الوارد 

تأسس الموقع سنة 2001 يضم الموقع العديد من الزوايا منها اول غرفة المندائية للمحادثة الصوتية, صفحة الأخبار،صفحة الكتاب,منوعات, كما انطلق من الموقع اول راديو مندائي على الأنترنت و نسعى جاهدين للأرجاع الخدمة
موقع الشبكة المندائية موقع محايد منما يميزة عن بقية المواقع على النت
تم انشاء الموقع ودعمة من قبل السيد ماجد حميد سعيد

 

رجال الدين المندائي