wrapper


شمس لن تغـيب ، ونـَـجم لن يـأفـَـل

شـَرّفني بزيارته لى في مكتبي يوماً في بغداد / الصالحية ساحة جمال عبد الناصر ، في السبعينات على ماأظن ، أهدى لي كتابه الموسوم ( حياة لينين ) ، ولم أره بعد هذا اللقاء قـَـط ، واحتفظ برسالة منه لي بخط يده الجميل . أقرأ كل مايكتبه في وسائل الإعلام  ، قال في رسالته لي : ( يسرني أن تكون ممن يتابع ماأكتب .. وأحب أنك تقصد هنا بالذات مانشرته في المجلات المندائية ، أما مانشرته في غيرها فما أخالك قد قرأته ، فأنت حسب علمي، لست ممن يتابع المنابر اليساريـة )

قـَـبـّلـْت رسالته ، التي هي بين يدي الآن / اوتاوا 22/1/1996 ... وبكـيـت ...!

أطال الله عمرك ياخال ، وثلثين الولد من خالـَـه كما قيل ...!

المحامي

عـماد عـبد الرحيم الماجدي

الـمسودني

يـَسْباهي الوَرد إسمك ـ أعـمالـَـك تِـعِط عـنبـَـر 1

عـزيـز أو إسمك امن الـْعـز ـ والعِـز إنت يتبختـَـر2

الـزينات كلهَه اتگـول ـ نِـشهَد نكـتب ابدفـتـََـر

صيتـك نجمه للضايع ـ صبـّـه تِـشهـَد اوشـَمـّـر3

يـبو اسعود الصدگ والحق ـ يالكِلـّك فِـكِـر تـگطر4




ياصبّي وبن دينك ـ نشمي او(درفشك) يـفخـر5

نِـذرت الروح للوادم ـ ضلعك كل وكت مَعـبر

بعضهم يهدم الچالي ـ وانت ابچـفـك اتـعـمـّـر

إسمك خالدَه احروفه ـ أبـوك أوجَـدك الأشهَـر

(شبـْل الأسَـد) بعلومـَه ـ موكِلمن قـِــره ابدفـْـتـَـر

يـُموت الـْزين بس جسمه ـ تظِل روحه نجم يزهـِر

وايـْموت الردي ابروحـَه ـ جسمَـه امن الثخِـن ينطـَر

كِــلـْشي البالأرض يكبر ـ والإنـسان مايـُـكـبـَـر6

متواضع يـَمِـثــْـل الماي ـ من يسگي الأرض تِـبشـِـر

لكن (سبع) بعـْـلومـَـك ـ ع الحـق تِـرعِـد اوتِـزئـِر

وانت يا (عـزيز) الگـوم ـ شمس الگـوم من تحمـَر

دهـْرك للعلم ياجـَـدي يـفـْنـيـه

يحطـّه ابوسط عينـَه اوبين يفـنيـه 7

إذا كـان الضحـَـك لِـلـْغـُـبـُن يـفـنيـه

عليمـَن نِضحـَـك ابـْشدّة بـلِــيـّـه

نِـذرت الروح لِـلمـَبـدأ ـ إنـْت (المـَبـْـدأ الأكـْـبـَـر)

سمعـت الوادم اتغـَـنـّي ـ (على الميمَـر على المـيمـَـر)7آ

لا (نخـل السماوَه) ايـحِـب ـ  على (اسميجـه) الهجر حـدّر8

ولا امظفر بـچـه اصويحب ـ يكـلـّـه اشمالك امطـبـّـر؟9

أربـَـع وَرد لِـثــْـمانيـن ـ عـُـمـْرَك لِـلـورد مـَـعـْطـَـر

***

أتـذكر گـعـَـدت اوياك ـ والگـعـْده ردِت تـِـثـمـُر10

تـِـتـذكر گِـلتـْـلي الـنـّوب ـ بالأبـرَه انـْحـفـُـر أنهـر ؟ 11

تِـتـذكـَر گِـلِـت خالي ـ نواعـير العِـشگ تِـفـتـر؟

تِـتـْـذكـَـر گلت فـَـد يوم ـ نجـْم البلسمـَه  يسْـهـَـر؟

تِـتـْـذكـَر گِـلِـت فلاح ـ لازم يــزرع اويـبـْـذر ؟

تِتـْـذكر گِـلت لازم ـ (مناجـِـل) كل أرض تحفـُـر ؟12

گلتلي (اصويحب) ايغني ـ أگلك خالي هـَـم تِـذكر ؟

گلتلي (اصويحب)  ابگلبه ـ (چاكوچـه) يدگ معـْبـَر ؟

يغـَـني غِـنـْـوه لـِـلعـُمال ـ حـرالوطن والمنـبـَـر

مو گِـلـْتِ المـشانِـق دوم ـ مرجـُوحات بالـْـمحـْـشر ؟13

صحيح اتـْمرجحَـوْ بيهه ـ ورد الناس چـان احـْمـَر

(صبيح) الهِـتـَف من زغـرَه ـ (چاكوچه) حچه اويشعـَر 14

حَمامه اوحضنت افكاره ـ اوغصن خـضـّرعلى الـمَگــْـبر 15

و(المنجل) شبگ (صبري) ـ چـفنهم بالگـبـُر خضـّـر 16

زلِـم (جبار وخضير) ـ (أبو اصبيـّح)  حچه اوفـسـّـر 17

(وعـَـد واحـْديد ومروّه) ـ (غـريبه)  والفكـر مـَنـوَر 18

(عبد الله عـَـلگ ـ نـوشي)  ـ قـدّم رگــْبـِـتـَه المنحـَـر 19

(خلـَـفْ) ولـْدَه شموس اتـْشع ـ مضيف اودلــّتـَه اتـعـَمـّر 20

صـَـبـّتنه نجـُـوم الليـل ـ تــلالي للـصبح لـوطـَـر

مـالـَـه اليحسِـد الـنـجمات مالـَـه

جـِـمـَع ماله اوحرس للمال مالـَـه

الـِـيخـَلــّـف فِـكِـر مامات مـالـَـه

جـِـبـَـل مهيوب واتخـافه الـمِنيـه

أصابع وبـْجـفـوف الإيـد ـ يـلِـبـْـهام إنـْـت والخِـنصر

يبو اسعـود النجم مَـيطـيح ـ لو طاح الــْـنجـِم نـِـخـسـَر

لـوعِـطشت يخـالي (الـكًــاع) ـ إنـت اتـْغـَـيـّم اوتـُمـْطـُـر

أربـَـع ورد لِـثـْـمانـيـن ـ عـُـمـْرَك لِـلـوَرد مـَـعـْطـَـر 21

يـَـخـالي الناس هالغـَنـَت ـ (على الميمَـر على المـيمـَـر)

لا (نخـل السماوه) انـْطـَـر ـ على (اسميچـه) الهَجر حَـدّر

ولا السياب ياخالي ـ يـُـموت اودنيِـتــَه اتـْمَـطـــّـر

ولا امظفر بـچـه اصويحب ـ يكًـلـّـه اشمالك امطـبـّـر؟

***

يبـُـو ازياد الشجـر إنت ـ فـَـيْـهـَه إنت والمْـثــَمَّر

( فحل الـتوث ) بالبستان ـ هـيبـَه اوأبـَد مايـِـثمـُر 22

و(الزرزور) دومه ايخاف ـ (حصوَه) امن الطفل يـُـشمـُر23

و(الـباز) اليريد ايموت ـ شموخه ابموتِـتـَـه يظهـر

الـفيـل اشكبر جثـتـَـه ـ والنحله إهِـي الأشطـَـر

والبيته گــزاز ايريـد ـ يـرمي احجار وايكـسـّـر24

نار (الـتِـبن) بس لهـْبه ـ اونار (الصاج) تِـتجمـّـر

ورد (الشوك) خرنوبه ـ تشِـعله الناس واتشـمـّـر

لكن (وردة الجوري) ـ تـزهي ابـريحةِ الـعنبـَر

والـقدّاح عِـطره ايفوح ـ نشـِم ابنسمته اويفخـَـر

إنت (الرازقي) الـْـقـدّح ـ عِـطره ايفوح كل مـَعبـَر

يـبو الطيبات والزينات ـ تـعال اوشوف هاالمحضـر

كلهه انكشفت الصبـّه ـ مامش بينه الـِمدثــّـر

بيهه (الترشم اوتبرخ) ـ بيـهه التعـْبد اوتستِـر

بيهه الياخِـذ الفايـز ـ بيهه الـْيسرق اويسكـَـر

بيهه الطيّـب اونشمي ـ بيهه الأغـبر المغـتـر

بيهه ايرفع (الدرفش) ـ بيهه الـمارق الأبـْـتـر

بيهه الياكِل (الخنزير) ـ بيهه ايـحـَرّم الـمـُنكـر

بيهه الينطي بالبسـكوت ـ (زدقة مال) من يكثـر

رَسـتَه اومرگـِنه اودرفش عِـلـيـنـَه

صـَبّه و( العهد گـشـطـا ) عِـليـنـَـه

الـمـارق من وطـَه إحـنـَه عِـلـيـنـَه

نـصـيـر انـجــوم باركـان الـثـريــّه

بيهه الينطي وايـْهـَوّس ـ يـريـد الناس بيه تـِشهـَر

ثِـمـانين اوزهور اربـَـع ـ إنـتَ الـخُـطبـَه والـمـَنـْبـَـر

يـَخـالي الناس هَـالغـَـنـَت ـ (على الميمَـر على المـيمـَـر)

لا (نخـل السماوه) انـْطـَـر ـ على (اسميچـه) الهَجر حـدّر

ولا امظفر بـچـه اصويحب ـ يگـلـّـه اشمالك امطـبـّـر؟

ولا السياب ياخالي ـ يـُـموت اودنيِـتــَه اتـْمَـطـــّـر25

***

يـاخالي أريـد أحچي ـ گالَــَوْ هذا خـَـط احـْـمـَر

اگـلهُم بـَس اسمعوني ـ گـالـَو إحـجـي لا تـكـفـر

گِـلـتِـلهم يصبّه الناس ـ صـارَت تـامِـر اوتِـنهـَر

بيهه الـصام عن شيـنه ـ عليهه الأغـَـم هاليفطـر

بيهه اليعرف احگـوگـه ـ بيهه (اليلـْـفـَح) اويـُهـْبر

بيهه ايعيش بجـْبينـَه ـ (عرگ گـصتـَه) شرف يگـطِـر

بيهه ايعـيش عَ الباطِل ـ يـُبوگ اوينهب اويغـْدر

بيهه اليحترم نفسه ـ بيهه الـروحـَه مايـگـدَر

بيهه الـقـَـشمر الصبّه ـ تاليـهه يـظِـل قشـمـَـر

بيهه الجـلِف من يومـَه ـ يابِـس يحرگ الأخضر

بيهه الـيهـْدم ابدينـَه ـ بيهه الـْـيبني وايـْـعـَمـّـر

بيهه (الـياكِل) الصبّي ـ لحمَه اوعظمتـَه ايشمـّر

بيهه (بـَـلسم) اجروحك ـ يـِـهِـِل ابدمعِـته اوينطر

تـُربط أجرب ابصاحي ـ يـُمـْرض خالي وايخـنـچـر26

الأجـرب يريد الماي ـ نِـص الـنهـَـر يـِـتصور27

يـگـول الشاطي بيه اوساخ ـ وساخه اوبيه مايـگـدَر

بـ ( الداته ) اشكثر صِرنه ـ نِـسب اونشتم اونِـسخـَـر

يـگـول الصبّه (رجعيـّه) ـ نِـتـقـدم يـريد اكـثــَـر

كلهه صارت اتمجـّـد ـ تاريخ الـچـذب مـَسـطـَـر

يردس حـيل ماضايـگ ـ طـعنه ابظهره من خنجـر28

والضايـگ (بـزيل الفوح) ـ يـلف اعمامه يتـكـَـتـّـر

ماظن الشمس تِـنباگ ـ ولا ظِـن البـدر يـُـنـفـُـر

صبـّه اوماتظن من طيب نِـخـله

طحينك لو جنيته الـزوم نخلـَه

تعيش اوتحتيي واتموت نخـْـله

عـُمود البيت والبيـتـك رچـــيـّه

نِـتـعـَولم يـريـد الـنـّوب ـ نِـتـمـَـقرط اونِـتـْحـَضـّـر

أربـَــعْ فـوگ الِـثـْمانـيـن ـ وانت الـخـطبـَه والـمـَنـْبـَـر

يـَخـالي الناس هالغـَنـَت ـ (على الميمَـر على المـيمـَـر)

لا (نخـل السماوه) انـْطـَـر ـ على (اسميچـه) الهجر حـدّر

ولا امظفر بـچـَـه اصويحب ـ يگـِلـّـه اشمالك امطـبـّـر؟

ولا السيّاب ياخالي ـ يمـُوت اودنيتـه اتـْمَـطـــّـر

***

ياخالي شِفـِـت هالـناس ـ  أسولفـْـلـَـك تـريـد اكـثـَـر ؟

تساوى الوَرد بالعاگـول ـ يـعـَيـْـب اعليه وايكشّـر

أم الشعـَر والگــرعَه ـ تِـساوَن والزمن قـرّر29

و(بو الجنيـّب) صار النـّوب ـ يـدَلـّي الصبـّه عَ المعبـَـر

صـار (الـدگـل) تمرتـنه ـ و(الخضراوي) يـِتـشـَمـّـر

صار( الأرنـَب) الـيفـْـتـي ـ گـام (الـْـفـَهـَد) يتعـَـذر

صـار البعض والله (اگـطوف ـ جگــاير) بالزبـل نشمـر

باگــَو (درفش اليهيا) ـ باعـَـوْ (گنزه) بالأصفـَـر

شـوهـَـو دين (شرشانه) ـ ذبـحـَو (يهيا) بالخنـجـَـر

باعـَو صبـّـه بالمازاد ـ باعـَو ديــن و(الأسـفـَـر)30

(إمام) الصبّـه راد ايصير ـ يـريـد ابـْصبـّـتـَه ايشـَوّر

ضِعنه اوضاعَـت البزرَه ـ غـرگــان اويريد الـبـَـر

ضعنه ابوسط (جلهيمـَـه) ـ حِـرگـَـَـوْ خِـشبـَة الـمـَعبـَـر31

آخـِـر (داره دارتـْـنه) ـ هِـنـيال العِـمـَـل واثـمـَـر

هذا الرّدت اگـولـَنـّـه ـ ماأحچـي بـعـَد أكـثـَـر

أشكيلك يـَـزين الـنـاس ـ يسـباهي الــْتـِعـِط عـنـبـَـر

ثـْمانـيـن اوزهور اربـَـع ـ وانت الـخطـبـَه والـمـَنـْبـَـر

زمـانـَـك إحْـذرَه لـو زاد خـَـطـبـَـه

مِـثل واحد ابـْدَمـّـه الـْسال خـطبـَـه

إنـْتَ الـْمـَـنـبـَر اولِـلـْفِـكِـر خـطـْبـَه

سـلام اوتهتِـف ابـْأرض الـوطيـّـه

يـَخـالي الناس هالغـَنـَت ـ (على الميمَـر على المـيمـَـر)

لا (نخـل السماوه) انـْطـَـر ـ على (اسميچـه) الهجر حـدّر

ولا (امظفر) بـچـَه اصويحب ـ يگــلـّـه اشمالك امطـبـّـر؟

ولا (الـْـسياب) ياخالي ـ يـُموت اودنيتـه اتـْمَـطـــّـر

شرح كلمات القصيدة

1 : سباهي خلف لفته شبيب الخميسي والد مفكرنا الجليل عزيز سباهي

2 : عزيز :  إسم مفكرنا الجليل عزيز سباهي

3 : شـَمـّـر من أكبر العشائر المعروفة في العراق والأقطار العربية

4 : أبو سعود : سعد الإبن الكبير لمفكرنا الجليل عزيز سباهي

5 : درفشك : درفش رمـز السلام

6 : مثل شعبي ( أجـّلكم الله ) الزبالة تكبـر وبنيادم مايكبر

7 : يفنيه : جفنيه

8 : من الأغنية : ع الميمر او ع الميمر

9 : اصويحب : إسم فلاح مناضل ورد اسمه في أحد قصائد شاعرنا مظفر النواب :

لا تفرح يالِـقطاعي ، إذا المنجـل يموت اصويحب ايداعي

10 : الزيارة الكريمة لمفكرنا الجليل عزيز سباهي لمكتبي / بغداد الصالحية

11 : من المثل الشعبي : يحفر بير ببـره

12 : مناجل : مفردها منجل

13 : مشانق : مفردها مشنقة

14 : صبيح : المناضل الشهيد صبيح ( صباح ) سباهي : شقيق مفكرنا الجليل عزيز سباهي

15 : المـكًـبر : المدفـَـن

16 : صبري : المناضل صبري سباهي : شقيق مفكرنا الجليل عزيز سباهي

17 : المناضلان جبار وخضير أولاد عبود أولاد عم مفكرنا الجليل عزيز سباهي

المناضل أبو صبيح ( عبد الإله سباهي ) شقيق مفكرنا الجليل عزيز سباهي

18 : المناضلتان وعد هاشم ، غريبة عبود : بنات عم مفكرنا الجليل عزيز سباهي ـ مروة والدة مفكرنا الجليل عزيز سباهي ، مناضلة عاصرت نضال جميع أولادها عزيز وصبري وعبد الإله وصبيح : روت لي والدتي إبنة عم مفكرنا الجليل عزيز سباهي :  ذات يوم داهمت شرطة الباشا نوري سعيد دار سباهي ، وكانت بعض الكتب التي واجِـهـَـتها صورة ماركس ولحيته الكثه ، وانجلز كذلك ، فسالتهم مروّة والدة استاذنا عزيز : ليش يمـّه شتريدون ؟ فقالوا لها شنو هذه الصور ؟ فما كان من والدة أستاذنا الجليل أن تجيبهم على الفور وبلباقة ـ ولما كان أهلنا الصابئة يطيلون لحاياهم ـ  يـُمـّه هذول اجدود الـفروخ ...!

19 : المناضل عبد الله علـًك : إبن عم مفكرنا الجليل عزيز سباهي ، المناضلة نوشي زوجة عبد الله

20 : خلف جد مفكرنا الجليل عزيز سباهي

21 : أربع ورد لِـثمانين : 84 عام انقضى من عمر مفكرنا الجليل عزيز سباهي أطال الله عمره

22 : مثل شعبي : فحل التوث بالبستان هيبه

23 : بيت الشعر : وفي الزرازير جبناً وهي طائرة ـ وفي البزاة شموخاً وهي تحتضر

24 :بيت الشعر : عجبٌ ترمي قومٌ بالأكـَـر ـ فئة تسكمدن بيتاً من زجاج

25 : السياب الشاعر المرحوم بدر شاكر السياب

26 : بيت الشعر : لا تربط الجرباء حول صحيحة ـ خوفي على تلك الصحيحة تجـرَبُ

27 : مثل شعبي : النعجة الجربه تشرب المي من نص الشط

28 : هوسه شعبية : يردس حيل الماضايكًهه والضايكًهه ايلف اعمامه

29 : اتساوت الكًـرعه ويّ أم الشعر

30 ـ الأسفـر : أحد الكتب الدينية للصابئة

31 ـ الجلهيمه : الأرض الصبخة التي لا يسكنها أحـد

Last modified on الثلاثاء, 03 آذار/مارس 2015

عن الموقع

 المندائية موقع مندائي اخباري يختص بالقضايا المندائية الدينية والأجتماعية كما يوفر اخبار حول العالم يتيح للكتاب نشر مقالاتهم كما لا يتحمل الموقع أي مسؤولية قانونية عن دقة أوصحة أو شمولية  المعلومات الوارد 

تأسس الموقع سنة 2001 يضم الموقع العديد من الزوايا منها اول غرفة المندائية للمحادثة الصوتية, صفحة الأخبار،صفحة الكتاب,منوعات, كما انطلق من الموقع اول راديو مندائي على الأنترنت و نسعى جاهدين للأرجاع الخدمة
موقع الشبكة المندائية موقع محايد منما يميزة عن بقية المواقع على النت
تم انشاء الموقع ودعمة من قبل السيد ماجد حميد سعيد

 

رجال الدين المندائي