wrapper

إذا چـان ... إذا صــارmo7ameEmad

إذاچـان (العـُمـَر) مَحـْسوب بـالأيـّـام

نخاف الموت ليش اونِحسِب احسـابـَـه ؟

إذاچـان الوكِـت (غِـنواته) هـَد الحيـل

خـَـل اندگ (طبل) نعزف على اربابـَه

إذاچـان (الوكِـت) مأمونـَه بيه الـناس

عليمن هالـبشر يحـزن على احـبابـَـه؟


إذاچـان (الوكِـت) توّبـْنـَه من الـويـل

نچـويهَـه (الإديـن) انـريـد عـِطـّـابـَه

إذاچـان الوكت يتـزوّج امن الـْـبـيـن

لازمـْنـََـه نِــروح اعـليـه (خـطـــّابـَه)

إذاچـان الوكِـت مكتوب بـيه الضـّـيم

خـَـلــّونـَـه نِـمـَزّق ورقـَـه واكـْـتابـَه

إذاچـان الوكت حـَط (السبع) بـشبـاچ

ليش انخاف خـويه (السبع) وانهابه ؟

إذاچـان (الوكت) يبخـَـل علينه ايگـوم

خـلـّـونه نعـوفـَـه انـْسَـدسِـد ابـوابـَه

إذاچـان الوكِـتْ مثل (الگـبـُر) ناطـور

خـل نِـبچـي عـَـليه اونِـنگِـل اتـْـرابـَه

إذاچـان (العـُمر) مَحـسوب بـالأيـّام

نخاف الموت ليش اونحسب احسـابـَـه؟

***

إذا صار الوكت يحتـُرم (ثـَعـلب) ليـش

طـبعه أيـبـَـدلـّـه اومايـسكِـن الغـابـَـه؟

إذا صار الوكت (غرنوگ)  بيه إيصير

(ريشـه) ايهلــّسه يتحسـّد (اغـرابـَـه)

شـو صار الوكت بيه (الديوچه) اتبيض

و (اشـباه الـْـزلم) تِـلبـَـس العـصـّـابـَه

إذا صار (الـوكت) بـيه الأمان إيـْصيـر

تِـحـرس بالغـَـنـَم ياخـوتي (الـِـذيابـَـه)؟

شو صار الوكت لو ترمي بيه القوس

يرجعله (السهـَم) وايصير (نِـشـّابـَه)

إذا صار (الوكِـت) يـتسيـّد الطيـبـيـن

يصير السيف اغم وايموت بـ (اگرابه)

إذا صار الوكت (مَحلوب) موش احليب

تگـطـّع كل حـَـليبـَه (شچـوة اجرابـَـه)

إذا صار (الوكت) يتگاوه ويّ الـزين

يگوم (التيس) خويه ايحِـبـّـه وايهابه

إذا صار الوكت بيه او (نِـزيزه الگاع)

يـنـذل (الورد) واتـْطگطِگ اعــشابـَه

إذاچـان (العـُمـر) مَحـسوب بـالأيـّام

نخاف الموت ليش اونحسب احسـابـَه؟

***

إذا صار (الوكت) مفگوسه بيه العين

يتـْعارك (جـِـفنهه) اويهجـِر اهـدابـَه

إذا صار (الوكت) لامـَعـنه بيه اوفود

(مـُـوت الـواحِـد اوتِـتـْعـَـدّد اسبابـَـه)

إذا صار (الوكت) يـتـنكـَـر الأنـْساب

شريف ايضيع اسمه اوضاعت انسـابه

إذا صار الوكت مهجوره بيهه ابيوت

يگوم (البوم) يتبطـّر على (اخـرابه)

إذا صار (الوكِت) بيه التوازن مات

(عگروگه) اعله (رگ) اتشيخ مـَتـْهابه

إذا صار (الوكت) ظالم اومو مظلوم

يـِتبـَرّه الـْـكِـتل و (العيسى) صـلاّبـَـه

إذا صار (الوكت) إيـْبـَرّي بالـمـَظـلوم

تِـهِـب الناس كِـلهـَه اتصيـر نـَهـّابـَه

إذا صار (الوكت) يتغاوه ويْ عشـّاگ

يـِهـِد اعلـَه (الگمـَر) وايطلبـَه بـطلابـَه

إذا صار (الوكت) حبـّاب مرّه ايصيـر

يظِل (مسحور) دايخ ضـيّـع (احجابـَه)

إذاچـان (العـُمر) مَحـسوب بـالأيـّام

نخاف الموت ليش اونحسب احسـابـَـه ؟

***

غـَمـّه من (وكت) والغـَـمـّه للمـاشاه

(مومن) مايصلي اوعاف (مِحـرابـَـه)

مامِـش كِـل أمان ابهالـْـوكت يـانـاس

غـَـمـّـه من (وكِـت) يتبـاهه بـِچـلابـَه

(دنـْياتـَـك) وكِـت ، والوكِـت هم دنياك

(چرغدهه) انتكس وانباگ (چلابـّـه )

دنـْياتـَـك وكت چـَن (گرعَه) بيهه اخبال

تِـتـكاتـَـل (زلمنـَـه) اعلـيهـَه رَغـّـابـَـه

دنـْياتـَـك يـَصبّـي چـَـالضَـبُع جـوعـان

(فـضلـَه) من يشوف ايكـَـشـّر انيـابـَه

(دنـْيـاتـَـك) تِـجـارَه والـْـتجارَه اتـبـُــور

تـاجـر لو فِـلـَـس ، إيـراجِـع احسـابـَه

بيهه (الـشوك) يـزعل لوكـُبـَر بالگاع

إذا (التنـّور) عافه اومـات (حـَطـّابـَه)

إذا (المـُهره الكحيله) عاشرت (كِدشان)

تتناسَـه (الـفـَـرس) واتگطـّع (ارچابـَـه)

يـاويـلي (الـوكِت) ضيـّعـنـَه بالحَسباتْ

ضـاعـَت (خـوّتـَـه) ، والـْـمات (عـَرّابـَه)

اصـواب (الوكت) ماضي اويريد احساب

مـَـتـْحِـسـه أبـَـد ، يـاحِـرْگــَة ْاصـْـوابـَـه

طـِرگاعـَه الوكِـت لوطرگع اعله الـناس

سواديـنه غـَـضب وامشگّگ اثـيـابـَـه

إذاچـان (العـُمـُـر) مَحـْـسوب بـالأيـّام

إذاصـار (العـُمـُـر) مَحـْـسوب بـالأيـّام

نخاف الموت ليش اونحسب احسـابـَـه ؟

Last modified on الثلاثاء, 03 آذار/مارس 2015

عن الموقع

 المندائية موقع مندائي اخباري يختص بالقضايا المندائية الدينية والأجتماعية كما يوفر اخبار حول العالم يتيح للكتاب نشر مقالاتهم كما لا يتحمل الموقع أي مسؤولية قانونية عن دقة أوصحة أو شمولية  المعلومات الوارد 

تأسس الموقع سنة 2001 يضم الموقع العديد من الزوايا منها اول غرفة المندائية للمحادثة الصوتية, صفحة الأخبار،صفحة الكتاب,منوعات, كما انطلق من الموقع اول راديو مندائي على الأنترنت و نسعى جاهدين للأرجاع الخدمة
موقع الشبكة المندائية موقع محايد منما يميزة عن بقية المواقع على النت
تم انشاء الموقع ودعمة من قبل السيد ماجد حميد سعيد

 

رجال الدين المندائي