wrapper

لِـبسوا (ارساتيكم) واحتجـّـوا

المحامي

عماد عبد الرحيم الماجدي

mo7ameEmad

لِـبسوا (ارساتيكم) واحتجوا ـ بيديكم (غِـصن الزيتون)

إهواي البينه (نار) اوتشعِل ـ (غِصن الزيتون) ايحرگون

درفش والگنزه اترفعوهه ـ بعدين (الرهمي) اتنصبون

(طِرسو النشماثا) الشلتوهه ـ بـَعدين اشيوخ اتطرسون

جمعيات او مجلس روحي ـ اوقانون الصبـّه اتشرعون

و(الـمغـزل) حـِرگـَو صوفاتـه ـ گامـَوْ بالصبـّه ايغـِزلون

(هيبلزيوه) الوَصّه ابصبته ـ وانتوا البلصبّه (اتگطلون)

لنـْـكـُم قـشمرتـوا ابصبتنه ـ وابـْمـْوتاهم (تِـتـْمهـزون)



و (الجـَمعـيات) التِـتـكاثـَـر ـ تِـتـْوالد چـَنهـَه (الـْبـَزّون)

بـِـ (اشباط ابـْزازين العالم) ـ تِـتگافـز حـَتى ايكـثرون

والصبّه الجمعيّه العِـدهم ـ (تحبـَـل) يوميـّه ابكل لـون

والمهجَـر يابويه المهجـَر ـ كلهه اتـّحـْدت واينـَظـْرون

(أول ثـاني ثـالث رابـع) ـ بالخامِـس خـويه ايعِـقـدون

والسادس من هـَسه انكتبت ـ مِـسْودّه اولازم تِـقـرون

نكـتب خويه ابدَم الصبّـي ـ ايـْشربـون ابدمـّه ايثـردون

اتـْضحـْكون اليوم اعلينه ـ باچـر بالحـسره اوتـِـبچـون

لِـبسوا (ارساتيكم) واحتجوا ـ بيديكم (غصن الزيتون)

إهواي البينه (نار) اوتشعِل ـ (غِصن الزيتون) ايحرگون

***

ياويلي اعله الصبّي اودمّه ـ بيه ايبيعـون اويـشـرون

يـومِيـّه اوندفن بالصبـّي ـ والصبـّـه اوأهـله ايـْـنعـّون

يـومِيـّه او(گِـبره) ايهدمونه ـ واشيوخ الصبه ايـعِـدّون

يـومِيـّه استِـنـكار انـْسوّي ـ بـَس بالداتا اويحـتجـّون

يـومِيـّه اولطـميـّه اودَمعه ـ واطفال المات ايـلطـمُون

يـومِيـّه اوننعگ بالغربه ـ (غربان) ابغربه ايطيـرون

يـومِيـّه اونردح ياصبـّه ـ عَ (المامش) دوم ايردحون

يـومِيـّه انسب بعْض اونشتم ـ واعراض الصبّه ايهتكون

يـومِيـّه اوجمعيه انأسـّس ـ بفلوس (المنحَه) ايقسمون

يـومِيـّه اتـبـرّع يالصبـّي ـ مانِـدري ويـن ايـجـَمعـون

يـومِيـّه اونعْـقـد ندوتـنـَه ـ مات الصبـّي وايـرگـصـون

يـومِيـّه (المهجـَر) يهجـرنه ـ بالمهجـَر صـبـّه ايدفـنون

يـومِيـّه انطلـّع فــَد (بدعـَه) ـ بـِدعـات اهواي ايـْبـدعـون

لِـبسوا (ارساتيكم) واحـتجّـوا ـ بيديكـُم (غِـصن الـزيتـون)

إهواي البينه (نار) اوتشعِل ـ (غِصن الزيتون) ايحرگون

***

بالمهجر صارَو (نِـمرشته) ـ (اديوچه) اتكافز وايبيضون

بالمهجر واحد لو (بخـّر) ـ آلاف ابخـَـشمَه (ايفـسـّ .. ن)

بالمهجـَر كثرت لـمّتهم ـ كِل صبي ابظهره ايشتـمـون

بالمهجر حَـطـّو جمعيه ـ يوميـّه اوبيهـَه ايـْسكـرون

بالمهجر جمعـَوْ گلياثك ـ نسبه اومن عِـدهه ايلفحون

بالمهجر نعـقِـد قمـّتـنه ـ والصبـّه افـديوه ايصفگون

بالمهجر (منفه) اوبي ضعنه ـ واطفال الصبه ايضيعون

بالمهجر واحدنه اسْـتأسَـد ـ ع الصبي اوبيه ايدگـّون

بالمهجر عـَشـْرات الفِـتحـَوْ ـ جـَمعيـّات اويـتـفـتـلون

بالمهجر (إشعيط) ايقودك ـ و (امعيط) اورَبعه الـيفتون

بالمهجر (سمچات انيبـّس) ـ بالليل اونصنه ايشيتون

بالمهجر (نهجر) بالـْمندي ـ بالمنـْدي (زار) ايلعـبـون

بالمهجر باعوهه (الگنزه) ـ بفلوس الرسته ايربحون

لِـبسوا (ارساتيكم) واحتجوا ـ بيديكم (غِـصن الزيتون)

إهواي البينه نار اوتشعِل ـ (غِصن الزيتون) ايحرگون

***

بالغربـَه النوب اتغـرّبنـّه ـ أطفال البيهـَه ايخـِـرسون

طفل اشلون العايش (سدني) ـ يتفاهم ويْ باقي الكون

إبلندن لو بنتي اتزوجت ـ صبي (البسويد) إيـرطنون

وبهولنده الصبي اشيحچي ـ وي صبيـه امن (الغابون)؟

ذاك ايحلل ، هاذ اينظــّـر ـ واهـواي البينه ايغـردون

بالغـربـَه الموقع وايفصل ـ بالصبّـه ، الصبّه ايلبسون

بالغربَه طِرگاعه اوطاحت ـ ع الروس اوتالي ايصيحون

بالغـربـَه ، عفنه الخضراوي ـ بالزهدي خويه ايلگطون

بالغـربـَه عِـفنه (المندايي) ـ بكتاب الروهه اويـقـرون

بالغـربـَه نكفر بـ (الهيي) ـ (تشيوت اوأوزو) ايكرعون

بالغـربـَه ما (نِسغِـد) لله ـ (شِفـياهي) اوليه ايركعـون

بالغربَه نجمع بـ (اليورو) ـ او (ليرات) اشويـّه ايودّون

بالغـربـَه ناس اوتِـتجمَع ـ واحنه ابصبـّتـنه ايْطشرون

بالغـربـَه ناس التِـتـفاهم ـ واحنه ابلحظه اويختلفـون

بالغـربـَه ياهجرة غربـَه ـ والنوب الماري ايهجرون

لِـبسوا (ارساتيكم) واحتجوا ـ بيديكم (غِـصن الزيتون)

إهواي البينه (نار) اوتشعِل ـ (غِصن الزيتون) ايحرگون

إهواي البينه (نار) اوتشعِل ـ زيتون اوغصنه ايكسرون

Last modified on الثلاثاء, 03 آذار/مارس 2015

عن الموقع

 المندائية موقع مندائي اخباري يختص بالقضايا المندائية الدينية والأجتماعية كما يوفر اخبار حول العالم يتيح للكتاب نشر مقالاتهم كما لا يتحمل الموقع أي مسؤولية قانونية عن دقة أوصحة أو شمولية  المعلومات الوارد 

تأسس الموقع سنة 2001 يضم الموقع العديد من الزوايا منها اول غرفة المندائية للمحادثة الصوتية, صفحة الأخبار،صفحة الكتاب,منوعات, كما انطلق من الموقع اول راديو مندائي على الأنترنت و نسعى جاهدين للأرجاع الخدمة
موقع الشبكة المندائية موقع محايد منما يميزة عن بقية المواقع على النت
تم انشاء الموقع ودعمة من قبل السيد ماجد حميد سعيد

 

رجال الدين المندائي