Print this page


5566

تغربنه .....والغربه شكثر مرّه

نجر حسرات والحسره بأثر حسره

وعفنه الوطن وخطانه متعثره

غدرنه الزمن بأفعاله الرديه

عله فراكك ياوطن الروح متوجعه

مذلولين وكاس الذل منو يجرعه

خوفي يطول البعد وماألنه أبد رجعه

جذوري بكاعك تنادي عليه

يمته نعود ونتهنه بحلو صبحك

فيروز التغني والشمس ألك تضحك

واشوفك تشفه ويبره من الألم جرحك

ريتك تشفه ويصير الجرح بيه

دورنه بكتار الكون بشرقه وغربه

وتعبنه ومالكينه وطن مثلك نحبه

يبو النهرين فركاك شكثر صعبه

على وصلك ترد الروح ليه

كبرنه بعاد عنك ...مو بيدينه

وبسيرتك صبح ومسه ينور حجينه

عكب عينك يغالي شصار بينه

وبعدنه نتباهى بهويتنه العراقيه

يالساكن بنص الكلب وساكن صبا عيني

تعبني لفراك وذبت من شوكي وحنيني

أون توالي الليل لو طيفك يجيني

ونّه مبينه وونّه خفيّه

يخلي أمشي نرد للوطن ونعود

هروش الكلب ذوبلن وماظل فرد عود

أحنه أهل الأرض ولسومر نعود

ماريد بالغربه توافينه المنيه

حذام عبد السلام عامر

بقلمي بتاريخ 24.1.2013